1ܘܫܡܸܥܠܝܼ ܩܵܠܵܐ ܓܘܼܪܵܐ ܡ̣ܢ ܗܲܝܟܠܵܐ ܕܒܹܐܡܵܪܵܐ ܠܐܵܢܝܼ ܫܲܒܼܥܵܐ ܡܲܠܲܐܟܼܹ̈ܐ؛ ܙܹܠ݇ܡܘܿܢ ܘܫܵܦܟܼܘܿܢ ܠܦܝܼܵܠܲܐܣ̈ ܕܚܸܡܬܹܗ ܕܐܲܠܵܗܵܐ ܒܐܲܪܥܵܐ. 2ܘܐَܙܹܠܹܐ ܗ̇ܘ ܩܵܕ݇ܡܵܝܵܐ؛ ܘܫܘܼܦܸܟܼܠܹܐ ܠܦܝܼܵܠܵܐ ܕܝܼܹܗ ܒܐܲܪܥܵܐ؛ ܘܗَܘܹܐܠܵܗ̇ ܕܲܪܒܵܐ ܚܸܪܒܵܐ ܘܡܲܡܪܸܥܝܵܢܬܵܐ ܥܲܠ ܒܢܲܝ̈ܢܵܫܵܐ؛ ܐܵܢܝܼ ܕܐܝܼܬ ܗ݇ܘܵܘ ܠܗ݇ܘܿܢ ܠܪܘܼܫܡܵܐ ܕܕܵܒܼܵܐ؛ ܘܐܵܢܝܼ ܕܣܵܓܼܕܝܼ ܠܨܲܠܡܹܗ. 3ܘܗ̇ܘ ܬܪ̈ܲܝܵܢܵܐ ܫܘܼܦܸܟܼܠܹܐ ܠܦܝܼܵܠܵܐ ܕܝܼܹܗ ܒܝܵܡܵܐ؛ ܘܗ݇ܘܹܐܠܹܗ ܕܸܡܵܐ ܐܲܝܟܼ ܕܡܝܼܬܵܐ؛ ܘܟܠ ܓܵܢܵܐ ܚܵܝܬܵܐ ܡܸܬܠܵܐ ܓܵܘ ܝܵܡܵܐ. 4ܘܗ̇ܘ ܬܠܝܼܬܵܝܵܐ ܫܘܼܦܸܟܼܠܹܐ ܠܦܝܼܵܠܵܐ ܕܝܼܹܗ ܒܢܲܗܪ̈ܵܘܵܬܹܐ ܘܒܥܲܝܢܵܬܹ̈ܐ ܕܡ̈ܝܼܵܐ؛ ܘܗ݇ܘܹܠܘܿܢ ܕܸܡܵܐ. 5ܘܫܡܸܥܠܝܼ ܠܡܲܠܲܐܟܼܵܐ ܕܡ̈ܝܼܵܐ ܕܒܹܐܡܵܪܵܐ؛ ܙܲܕܝܼܩܵܐ ܝܘܸܬ؛ ܗ̇ܘ ܕܝܼܠܹܗ؛ ܘܗ̇ܘ ܕܝܼܗ݇ܘܵܐ؛ ܐܲܢ݇ܬ ܩܲܕܝܼܫܵܐ؛ ܣܵܒܵܒ ܠܐܲܢܹܐ ܕܸܢܘܼܟܼ. 6ܣܵܒܵܒ ܕܸܡܵܐ ܕܩܲܕܝܼܫܹ̈ܐ ܘܕܢܒܼ̈ܝܼܹܐ ܫܘܼܦܸܟܼܠܘܿܢ؛ ܘܕܸܡܵܐ ܝܸܗܒܼܸܠܘܼܟܼ ܐܸܠܵܝܗܝ ܠܸܫܬܵܝܵܐ؛ ܕܚܫܝܼܚܹܐ ܝܢܵܐ. 7ܘܫܡܸܥܠܝܼ ܠܡܲܕܒܚܵܐ ܒܹܐܡܵܪܵܐ؛ ܗܹܐ؛ ܡܵܪܝܵܐ ܐܲܠܵܗܵܐ ܐܲܚܝܼܕ ܟܠ؛ ܫܲܪܝܼܪܹ̈ܐ ܝܢܵܐ ܘܙܲܕܝܼܩܹ̈ܐ ܕܝܘܵܢܘܼ̈ܟܼ. 8ܘܗ̇ܘ ܪܒܼܝܼܥܵܝܵܐ ܫܘܼܦܸܟܼܠܹܐ ܠܦܝܼܵܠܵܐ ܕܝܼܹܗ ܥܲܠ ܫܸܡܫܵܐ؛ ܘܦܸܫܠܹܗ ܝܘܼܗ݇ܒܼܵܐ ܐܸܠܹܗ ܠܡܲܚܘܼܡܹܐ ܠܒܢܲܝ̈ܢܵܫܵܐ ܒܢܘܼܪܵܐ. 9ܘܦܸܫܠܗَܘܿܢ ܡܘܼܚܝܼܡܹܐ ܒܢܲܝ̈ܢܵܫܵܐ ܚܸܡܵܐ ܓܘܼܪܵܐ؛ ܘܓܕܸܦܠܘܿܢ ܠܫܸܡܵܐ ܕܐܲܠܵܗܵܐ ܕܐܝܼܬ ܠܹܗ ܗܘܼܟܡܵܐ ܥܲܠ ܐܲܢܹܐ ܡܲܚܘܵܬܹ̈ܐ؛ ܘܠܵܐ ܬܘܼܘܸܒܠܘܿܢ ܠܝܼܵܗ݇ܒܼܵܐ ܬܸܫܒܘܿܚܬܵܐ. 10ܘܗ̇ܘ ܚܡܝܼܫܵܝܵܐ ܫܘܼܦܸܟܼܠܹܐ ܠܦܝܼܵܠܵܐ ܕܝܼܹܗ ܥܲܠ ܬܪܘܿܢܘܿܣ ܕܗ̇ܘ ܕܵܒܵܐ؛ ܘܗَܘܹܐܠܵܗ̇ ܡܲܠܟܘܼܬܹܗ ܚܘܼܒܼܝܵܢܬܵܐ؛ ܘܠܲܨܠܸܨܝܼ ܗ݇ܘܵܘ ܠܸܫܵܢܵܝ̈ܗܝ ܡ̣ܢ ܕܲܪܕ؛ 11ܘܓܕܸܦܠܘܿܢ ܠܐܲܠܵܗܵܐ ܕܫܡܲܝܵܐ ܡ̣ܢ ܕܲܪ̈ܕܵܝ ܘܡ̣ܢ ܕܲܪ̈ܒܵܬܵܝ؛ ܘܠܵܐ ܬܘܼܘܸܒܠܘܿܢ ܡ̣ܢ ܦܘܼܠܚܵܢܵܝ̈ܗܝ. 12ܘܗ̇ܘ ܫܬܝܼܬܵܝܵܐ ܫܘܼܦܸܟܼܠܹܐ ܠܦܝܼܵܠܵܐ ܕܝܼܹܗ ܥܲܠ ܕܗ̇ܘ ܢܲܗܪܵܐ ܓܘܼܪܵܐ؛ ܦܪܵܬ؛ ܘܒܪܸܙܠܘܿܢ ܡܝܼܘ̈ܗܝ ܕܵܐܟܼܝܼ ܕܦܵܝܫܵܐ ܗܘܼܕܸܪܬܵܐ ܐܘܼܪܚܵܐ ܕܡܲܠܟܹ̈ܐ ܕܡ̣ܢ ܙܪܵܩܵܐ ܕܫܸܡܫܵܐ. 13ܘܚܙܹܠܝܼ ܡ̣ܢ ܦܘܼܡܹܗ ܕܬܵܢܝܼܢܵܐ؛ ܘܡ̣ܢ ܦܘܼܡܹܗ ܕܗ̇ܘ ܕܵܒܵܐ؛ ܘܡ̣ܢ ܦܘܼܡܹܗ ܕܗ̇ܘ ܢܒܼܝܼܵܐ ܕܵܓܵܠܵܐ؛ ܬܠܵܬ݇ ܪ̈ܘܼܚܵܬܹܐ ܟ̰ܲܦܵܠܹ̈ܐ ܐܲܝܟܼ ܦܸܩܵܩܹ̈ܐ. 14ܣܵܒܵܒ ܪ̈ܘܼܚܵܬܹܐ ܝܢܵܐ ܕܕܲܝܘܹ̈ܐ ܕܒܸܥܒܼܵܕܵܐ ܝܢܵܐ ܢܝܼܫܲܢܩܹ̈ܐ؛ ܕܒܹܐܙܵܠܵܐ ܝܢܵܐ ܥܲܠ ܡܲܠܟܹ̈ܐ ܕܟܠܵܗ̇ ܒܪܝܼܬܵܐ ܠܓ̰ܲܡܘܼܥܝܵܝ ܠܦܠܵܫܵܐ ܕܗ̇ܘ ܝܵܘܡܵܐ ܓܘܼܪܵܐ ܕܐܲܠܵܗܵܐ ܐܲܚܝܼܕ ܟܠ. 15ܘܗܵܐ؛ ܒܹܐܬܵܝܵܐ ܝܘܸܢ ܐܲܝܟܼ ܓܹܢܵܒܼܵܐ. ܛܘܼܒܼܵܢܵܐ ܝܠܹܗ ܗ̇ܘ ܕܝܼܠܹܗ ܪܥܝܼܫܵܐ ܘܢܵܛܸܪ ܓ̰ܘܼܠܘܼ̈ܗܝ؛ ܕܠܵܐ ܚܵܕܸܪ ܫܘܼܠܚܵܝܵܐ؛ ܘܚܵܙܝܼ ܢܚܸܦܬܹܗ. 16ܘܓ̰ܘܼܡܸܥܝܵܝܠܘܿܢ ܠܗ̇ܝ ܕܘܼܟܬܵܐ ܕܦܝܵܫܵܐ ܝَܠܵܗ̇ ܩܪܝܼܬܵܐ ܒܠܸܫܵܢܵܐ ܕܥܸܒܼܪ̈ܵܝܹܐ؛ ܐܲܪܡܵܓܸܕܘܿܢ. 17ܘܗ̇ܘ ܫܒܼܝܼܥܵܝܵܐ ܫܘܼܦܸܟܼܠܹܐ ܠܦܝܼܵܠܵܐ ܕܝܼܹܗ ܥܲܠ ܗܵܘܵܐ؛ ܘܦܠܸܛܠܹܗ ܩܵܠܵܐ ܓܘܼܪܵܐ ܡ̣ܢ ܗܲܝܟܠܵܐ؛ ܡ̣ܢ ܬܪܘܿܢܘܿܣ؛ ܒܹܐܡܵܪܵܐ؛ ܗَܘܹܐܠܵܗ̇. 18ܘܗ݇ܘܹܠܘܿܢ ܒܸܪ̈ܩܹܐ؛ ܘܩܵܠܹ̈ܐ؛ ܘܪ̈ܲܥܡܹܐ؛ ܘܪܵܘܕܵܢܵܐ ܓܘܼܪܵܐ ܗ݇ܘܹܐܠܹܗ؛ ܕܐܲܝܟܼ ܠܵܐ ܗ݇ܘܹܐܠܹܗ ܡ̣ܢ ܕܗ݇ܘܹܠܘܿܢ ܒܢܲܝ̈ܢܵܫܵܐ ܥܲܠ ܐܲܪܥܵܐ؛ ܕܐܲܝܟܼ ܕܐܵܗܵܐ ܪܵܘܕܵܢܵܐ ܗܲܕܟܼܵܐ ܓܘܼܪܵܐ. 19ܘܗَܘܹܐܠܵܗ̇ ܡܕܝܼܢ݇ܬܵܐ ܗ̇ܝ ܓܘܼܪܬܵܐ ܠܬܠܵܬ݇ܐ ܣܵܡܹ̈ܐ؛ ܘܡܕܝܼܢܵܬܹ̈ܐ ܕܛܵܝܸܦܹ̈ܐ ܢܦܸܠܘܿܢ؛ ܘܒܵܒܹܠ ܗ̇ܝ ܓܘܼܪܬܵܐ ܦܸܫܠܵܗ̇ ܕܟܼܝܼܪܬܵܐ ܩܵܕ݇ܡ ܐܲܠܵܗܵܐ؛ ܠܝܼܵܗ݇ܒܼܵܐ ܐܸܠܵܗ̇ ܟܵܣܵܐ ܕܚܲܡܪܵܐ ܕܚܸܡܬܵܐ ܕܟܲܪܒܹܗ. 20ܘܟܠ ܓܵܙܲܪܬܵܐ ܥܪܸܩܠܵܐ؛ ܘܛܘܼܪܹ̈ܐ ܠܵܐ ܦܸܫܠܗَܘܿܢ ܡܘܼܫَܟ̰ܚܹܐ. 21ܘܒܲܪܕܵܐ ܓܘܼܪܵܐ؛ ܐܲܝܟܼ ܟܲܟܪܵܐ ܒܬܩܘܼܠܬܘܼܗܝ؛ ܨܠܹܠܹܗ ܡ̣ܢ ܫܡܲܝܵܐ ܥܲܠ ܒܢܲܝ̈ܢܵܫܵܐ؛ ܘܓܕܸܦܠܘܿܢ ܒܢܲܝ̈ܢܵܫܵܐ ܠܐܲܠܵܗܵܐ ܡ̣ܢ ܡܚܘܿܬܵܐ ܕܒܲܪܕܵܐ؛ ܣܵܒܵܒ ܕܓܘܼܪܬܵܐ ܗ݇ܘܵܐ ܡܚܘܿܬܹܗ ܪܵܒܵܐ.